Um vegatolla

Miðvikudagur, 12. janúar 2011 - 16:15

 

Að undanförnu hefur verið mikil umræða um vegatolla á þjóðvegum til og frá höfuðborgarsvæðinu. Stjórn Neytendasamtakanna fjallaði um málið á fundi sínum þann 10. janúar sl. Niðurstaða stjórnar var að leggjast harðlega gegn slíkri skattlagningu.

Neytendasamtökin benda á að skattlagning er nú þegar mjög mikil á kaupum og við rekstur bifreiða. Það er skoðun samtakanna að með vegatollum á ákveðnu svæði á landinu sé verið að rjúfa þá þjóðarsátt sem hefur verið varðandi vegagerð í landinu. Á sama tíma og lagt er í dýrar vegaframkvæmdir á landsbyggðinni, sem eru án gjaldtöku, stendur til að skattleggja íbúa á suð-vesturhorni landsins sérstaklega. Minnt er á að suð-vesturhornið er nú eitt atvinnusvæði. Með töku vegatolla væri því verið að mismuna almenningi herfilega.

Neytendasamtökin leggja áherslu á að ekki er sanngjarnt að leggja á vegatolla nema því aðeins að almenningur hafi valkost um að aka aðra leið til að komast hjá þeim. Hvalfjarðargöngin eru skýrt dæmi um slíkt enda geta þeir sem ekki vilja greiða vegna aksturs í gegnum göngin keyrt á veginum sem liggur um Hvalfjörð. Það er jafnframt ljóst að stór hluti landsmanna er á móti slíkri skattlagningu, það sýnir mikil þátttaka í undirskriftasöfnun á vegum Félags íslenskra bifreiðaeigenda gegn þessum vegatollum ljóslega.