Um var að ræða tímabundinn leigusamning frá 1. mars 2009 til 1. mars 2010. Þegar leigjandinn kom heim frá útlöndum í júlí 2009 var svo búið að leigja íbúðina öðru fólki, skipta um læsingu á íbúðinni og fjarlægja búslóð leigjandans.

Um var að ræða tímabundinn samning til eins árs. Þegar u.þ.b. mánuður var liðinn af leigutímanum tilkynnti leigjandi að hann væri að flytja út þar sem læki úr svefnherbergislofti. Í kjölfarið hafði leigusali samband við íbúa á hæðinni fyrir ofan sem komu í veg fyrir lekann.

Gerður var tímabundinn leigusamningur til 15 mánaða. Leigjendur lögðu fram tryggingavíxil við upphaf leigutíma. Vegna fjárhagserfiðleika fluttu leigjendur út úr leiguhúsnæðinu rúmum mánuði áður en samningnum átti að ljúka og töldu sér ekki skylt að greiða leigu síðustu tvo mánuði samningstímans.

Um var að ræða tímabundinn leigusamning til eins árs. Leigjandi sagðist hafa orðið fyrir töluverðum óþægindum vegna viðgerða og viðhaldsvinnu sem unnin var af leigusala og mönnum á hans vegum.

Um var að ræða tímabundinn leigusamning til eins árs frá 1. janúar 2009.  Leigjandinn flutti þó aldrei inn og rifti samningnum þar sem íbúðin væri ekki í því ástandi sem ætla mætti, veggir, gluggar og gardínur kámug og skítug auk þess sem raftengi inn á baðherbergi hefði ekki verið frágengið.